Sa Wikang Meranaw

SII KO PAGELETAN TA

[Meranaw ni Almayrah A. Tiburon]

Isa ko mitalingoma rekta so kaliboteng

inisaan akongka, saken ko ginawa ko

ino oto dimbailat so manga raon

ino oto pesegad so manga ator

ino oto mamis so arek

ino oto mayaw so manga gakes aken

ino kaiko mailai ingka a miiket

so manga limang ka ko manga lima ko

ino oto di manggola-ola so manga panganggogola-ola

go pekasowa-sowa so manga mbarambarang a pekasowa-sowa

mipantag ko kapakaririparado iran, na kenaba rekta

na ino oto matodir so looka gawi-i

na ago ino pagoran kaiko lomalakaw ako.

Inipo o manga kemer ka

so manga bok aken

so kiray aken go pire-pirek

so mbalabala ko manga modol aken

na pisarakanan ka a mailay ngka so sembag

ko lango-langon aya, mabatiya ka sii ko ropaan o bontal aken

o andamaya i kaboka-i aken ko kalek aken

sii ko gagawi-i a lagid o sanggibo a gagawi-i

a seka i madadanga ko, na kenaba siran

go saken i madadanga aka, daden ko isa kiran bo

pekasowa-sowa so mbara-mbarang a pekasowa-sowa

mipantag ko kapakaririparado iran

lagid aya, dimbalait so omani isa

ko ombi a pakalibog ko liyawao o manga waga ta

ago inampit o pamikiran ka so puso o ka

an di kelekaan so kalelekeban

an di kageba so manga piyakatindeg a keleb

na pekailay ta man so omani isa

manga okita, ko piyakaisa-isa a niyawa

di aken reka imanto di teroon

a ketokawan ka bo so sembag o maranon ka.